- سمعت آخر تسريب؟
ـ باقولك إيه، كل دي تسريبات الإخوان مفبركينها، وعمري ما أصدقها.
ـ فاكر لما قلت لك كده على المكالمات اللي كانت بتتذاع للبرادعي وشباب الثورة، مع إن كلها كان رغي فاضي، قلت لي ما حدش يقدر يفبرك ويجيب الأصوات كده بالمللي، على العموم يا سيدي التسريب الأخير طلع لمحمد مرسي، ده اتفضح فضيحة يا جدع.
ـ هو ده الكلام، اشجيني، فضحوه إزاي؟
ـ ما فيش طلعوا له تسجيل في قصر الرئاسة مع مدير مكتبه، قاعدين بيقولوا إن غلطة مصر إنها ماخدتش من دول الخليج فلوس كتير، لما الجيش راح يحارب في الخليج، زي ما حافظ الأسد عمل، وإن ده مش لازم يحصل تاني، لإن بتوع الخليج عندهم فلوس زي الرز، وقعدوا يتفقوا إزاي هيلموا من كل دولة خليجية عشرة مليار، يتحط أغلبهم في حسابات بره، ويتحط قرشين منهم في البنك المركزي.
ـ يا نهار أسود، دول كانوا عصابة بقى، لازم الناس دي تتحاكم بتهمة إهانة الجيش المصري، ده غير التآمر لسرقة موارد الشعب.
ـ بس حق ربنا، قالوا في التسجيل إنهم هيشغلوا الفلوس بره، وبعد كده، لما تعمل أرباح يدوها للبلد تاني.
ـ وهو اللي بيروح بره بيرجع يا عم، وبعدين لمّا تيجي معونات للبلد تدخل خزينة البلد على طول، غير كده تبقى سرقة.
ـ لا والأنكى من ده، طلع مدير مكتبه بيقول على الشعب المصري إنه جعان.
ـ كمان، لازم يتعدموا، اللي يهين الشعب المصري لازم يتعدم، وبعدين هو حد جوّع الشعب أصلاً غير السرقة والنهب.
ـ بس الإخوان عمالين يقولوا على النت إن التسريب ده متفبرك، وإنه شغل مخابرات.
ـ مش صوت مرسي طالع فيه؟
ـ هوه بغباوته، بذبذبات صوته بالمللي، وبعدين ده تسجيل كبير مش دقيقة ولا اتنين.
ـ يبقى خلاص، يتعدموا فوراً.
ـ استنى بس، لما تشوف الأنكى من كل ده. طلع في تسجيل تاني، مدير مكتبه بيكلم جهات أجنبية، ونقل معلومات عن اجتماع هيحصل للمجلس العسكري، قبل ما الاجتماع يتعمل أصلاً.
ـ يا نهار أسود، كمان قضية تخابر مع جهات أجنبية، كان بيكلم مين بقى بسلامته؟
ـ كان بيكلم مساعد رئيس الديوان الملكي السعودي.
ـ السعودي؟ إزاي، هو مدير مكتب مرسي كان فاتح مع السعودية من ورا مرسي؟
ـ مرسي إيه؟ أنا باكلمك عن مدير مكتب السيسي.
ـ إزاي، انت مش بتقول لقوا تسجيلات لمرسي بيتكلم عن فلوس هتتلم من الخليج، وهتتحط في حسابات بره.
ـ أيوه، ده تسجيل للسيسي بيتكلم مع مدير مكتبه.
ـ باقولك إيه مش طالبة هزار، إنت مش كنت بتقول إن مدير مكتب مرسي كان بيقول على المصريين جيعانين؟
ـ لا ده مدير مكتب السيسي، والتسريب أهوه خد اسمعه بنفسك.
ـ لعلمك التسريبات دي كلها متفبركة، وأجهزة مخابرات وسخة هي اللي عاملاها، واللي فبركها وبيذيعها واللي بيصدقها، كل دول لازم يتعدموا فوراً عشان البلد تنظف. -
